اليوم
لندن 28 ماي 2021
،السبعة وربع متاع الصباح حلّيت عِينيَا
،نهار جديد
جمعة كاملة برد و مطر و ريح لكن اليوم هاي السما صافية و الشميسة زارقة
أول حاجة عملتها حمدت ربي عالهدية الكبيرة و الغالية إلي لقيتها اليوم, هدية قيّمة ياسر و ماتتشراش بالفلوس وذهب العالم
!مازلت حي
إي نعم، الهدية هي الحياة
ربي يحبني برشا أكيد لدرجة أنو عطاني نهار آخر في عمري
مازلت نتنفس، مازلت نشوف، مازال قلبي يدق، مازالت الصحة جيّدة، مازالت عندي ماكلة فالكوجينة، مازال عندي سقف نكن تحتو راسي، مازالت عندي القوة باش نخدم و العقل باش نفكر و نكتب و اليدين باش نصنع، مازال عندي بابا و أمي و خواتي ربي يسترهم و يخليهم و مازالت حي نرزق
!ملا نِعَمْ و ملا هدايا
الشكر ليك يا ربي ،آش تسوى الدنيا و مشاكلها و خُرمها قدام الشوية نِعَم هاذوم إلي ربي حَبّني ووَفِرهُملي
كيفاش نَجِّمْ نقوم مِتْغَشْش ولا مَهْمُوم؟
كيفاش مانحمدش ربي و نشكرو مليون مرّة؟
عندي برشا مشاكل مادية، عاطفية، مهنية، يمكن أقل و أهون من برشا عباد و يمكن أكثر, المهم المشاكل موجودة وكل واحد و حُرُوبو الخاصة بيه
لكن كِيفْ نخَمِم إلي أنا مازلت حي باش نجم نكتب الكلمتين هاذوم، تهون المشاكل هذي لكل
إنسان حَبِيتُو مشَا و خلاك؟ مكتوب و ربي يعوض في ما أحسن و ما خير
طَردوك مالخدمة ولا بطال؟ ما تيأسش قوم و شوف خدمة، الرزق بيد ربي وإلى خلق ما يْضَيّع
عندك برشا ديون؟ إكبس السنتورة و خبي و إخدم زوز خدم كان لزم باش تنطر الفرنك
مشاكل صحية؟ ربي يلطف بيكم و بينا كان الدواء و العلاج موجود ، غصرة وتتعدى
حد قريب توفى؟ سُنّة الحياة و كلنا ماشين غادي، ربي يرحم إلى مات و ربي يفضل و يستر الباقين
غْلُط في حق عبد؟ أطلب السماح منو، بَصِدق من قلبك و صلّح الغْلَط كان نجمت وتعلم مالغلطة
ظلموك و غُلطو فيك و حكاو في ظهرك؟ خوذ حقك و كان منجمتش، عادي، عادي جدا هذيكا طبيعة الدنيا وهذاكا بنادم ساعات الشر يغلب.كون قوي و وماتاقفش غادي، قال الراجل ما تشيل هم
هاذم عينة صغيرة جدًا مالمشاكل اليومية إلي نعيشوها، فما ما أهون و فما ما أشنع ألف مرة
إلي نحب نقولو ماللخر و عاللخر مشاكل و مصائب الدنيا في شيرة و كونك مازلت حي في شيرة أخرى
محلاها الكلمة و قداش تعطيني قوة و طاقة و عزيمة و أمل: أنا حي
تعلمت مالتجارب القاسية و الجميلة زادة متاع الدنيا إلي لازم نعيش كل نهار على أساس أنو ينجم يكون آخر نهار في حياتي
على هذاكا لازمني نعطي ألف بالمئة من روحي في كل حاجة نحب نعملها، باش كان كْتِب إلي هذا آخر نهار في عمري نمشي فرحان و فخور بنفسي إلي عملت كل حاجة في مقدوري باش ننجح و باش نكون إنسان إِسْتحَق هدية الحياة
اليوم باش نحمد ربي قد ما نّجم على كل حال
اليوم باش نكلم بابا و أمي و خواتي و نقلهم نحبكم
باش نختار كتاب جديد نبدا نقراه
باش نتعلم عالأقل حاجة جديدة
اليوم مانيش باش نغشش روحي على حتى حاجة
مانيش باش نخمم فالمشاكل إلي تعدّاو و وفاو
اليوم باش نحاول نعاون عالأقل إنسان واحد، بكلمة، بنصيحة، بإلي كتب ربي من فلوس, بأي حاجة
اليوم باش نبتسم للعباد إلي باش نقابلهم و باش نحاول نعطي كان طاقة إيجابيّة
اليوم لاني باش نبكي ولاني باش نشكي لا عالفلوس، لا عالخدمة، لا على الزهر ولا عَلِّي إختارو باش يخرجو من حياتي
تركيزي و طاقتي اليوم على نفسي و على كل شىء إلي نحب نبنيه و إلا نطَوْرُو
هذا موش معناه إلى أنا مانقراش حساب غدوة و لا مانستخلصش الدروس مالبارح، أبدا
لازم نفهم و نقري الماضي و نحَظِّر و نستشرف غدوة و نحدد أهداف للمستقبل ولكن طاقتي في إلّي قدامي اليوم
الهدف متاعي اليوم إني نكون إنسان أفضل، أرقى، أعقل، أقوى، أنجح، أذكى، أزين، أضمر، أصدق و أكثر إمتنان للخالق
الشئ هذا مانيش أنا أكتشفتو و مانيش أول واحد كتبو ولكن جربتو و عشتو و تعلمتو
و في اللّخر، غدوة كان مازلت حي، باش نقرى المذكرة هاذي و أكيد باش نبتسم مهما باش يصير اليوم
باش نقول الحمد الله على نهار آخر جديد و فرصة أخرى و تحدي جديد و أمل جديد و هدية آخرى و إنشالله أكثر أيامي و أيامكم نجاح و فرحة
ياسين الكريمي
لندن، 28 ماي 2021